Vishnu Dashavatara Stotram

॥ श्री दशावतार स्तोत्रम् ॥ (जयदेव कृतम् - गीतगोविन्दात्) प्रलयपयोधिजले धृतवानसि वेदम्। विहितवहित्रचरित्रमखेदम्। केशव धृतमीनशरीर जय जगदीश हरे॥१॥ क्षितिरतिविपुलतरे तव तिष्ठति पृष्ठे। धरणिधरणकिणचक्रगरिष्ठे। केशव धृतकच्छपरूप जय जगदीश हरे॥२॥ वसति दशनशिखरे धरणी तव लग्ना। शशिनि कलङ्ककलेव निमग्ना। केशव धृतसूकररूप जय जगदीश हरे॥३॥ तव करकमलवरे नखमद्भुतशृङ्गं दलितहिरण्यकशिपुतनुभृङ्गम्। केशव धृतनरहरिरूप जय जगदीश हरे॥४॥ छलयसि विक्रमणे बलिमद्भुतवामन। पदनखनीरजनितजनपावन। केशव धृतवामनरूप जय जगदीश हरे॥५॥ क्षत्रियरुधिरमये जगदपगतपापम्। स्नपयसि पयसि शमितभवतापम्। केशव धृतभृगुपतिरूप जय जगदीश हरे॥६॥ वितरसि दिक्षु रणे दिक्पतिकमनीयम्। दशमुखमौलिबलिं रमणीयम्। केशव धृतरामशरीर जय जगदीश हरे॥७॥ वहसि वपुषि विशदे वसनं जलदाभम्। हलहतिभीतिमिलितयमुनाभम्। केशव धृतहलधररूप जय जगदीश हरे॥८॥ निन्दसि यज्ञविधेरहह श्रुतिजातम्। सदयहृदयदर्शितपशुघातम्। केशव धृतबुद्धशरीर जय जगदीश हरे॥९॥ म्लेच्छनिवहनिधने कलयसि करवालम्। धूमकेतुमिव किमपि करालम्। केशव धृतकल्किशरीर जय जगदीश हरे॥१०॥ श्रीजयदेवकवेरिदमुदितमुदारम्। शृणु सुखदं शुभदं भवसारम्। केशव धृतदशविधरूप जय जगदीश हरे॥११॥

|| Shri Dashavatara Stotram || (Jayadeva Kritam - Geetagovindaat) Pralaya Payodhi Jale Dhritavaan Asi Vedam | Vihita Vahitra Charitram Akhedam | Keshava Dhrita Meena Shareera Jaya Jagadeesha Hare ||1|| Kshitir Ati Vipula Tare Tava Tishthati Prishthe | Dharanee Dharana Kina Chakra Garishthe | Keshava Dhrita Kachchhapa Roopa Jaya Jagadeesha Hare ||2|| Vasati Dashana Shikhare Dharanee Tava Lagnaa | Shashini Kalanka Kaleva Nimagnaa | Keshava Dhrita Sookara Roopa Jaya Jagadeesha Hare ||3|| Tava Kara Kamala Vare Nakham Adbhuta Shringam Dalita Hiranyakashipu Tanu Bhringam | Keshava Dhrita Narahari Roopa Jaya Jagadeesha Hare ||4|| Chhalayasi Vikramane Balim Adbhuta Vaamana | Pada Nakha Neera Janita Jana Paavana | Keshava Dhrita Vaamana Roopa Jaya Jagadeesha Hare ||5|| Kshatriya Rudhiramaye Jagad Apagata Paapam | Snapayasi Payasi Shamita Bhava Taapam | Keshava Dhrita Bhrigu Pati Roopa Jaya Jagadeesha Hare ||6|| Vitarasi Dikshu Rane Dikpati Kamaneeyam | Dashamukha Mauli Balim Ramaneeyam | Keshava Dhrita Raama Shareera Jaya Jagadeesha Hare ||7|| Vahasi Vapushi Vishade Vasanam Jaladaabham | Hala Hati Bheeti Milita Yamunaa Bham | Keshava Dhrita Haladhara Roopa Jaya Jagadeesha Hare ||8|| Nindasi Yajna Vidher Ahaha Shruti Jaatam | Sadaya Hridaya Darshita Pashu Ghaatam | Keshava Dhrita Buddha Shareera Jaya Jagadeesha Hare ||9|| Mlechchha Nivaha Nidhane Kalayasi Kara Vaalam | Dhooma Ketum Iva Kim Api Karaalam | Keshava Dhrita Kalki Shareera Jaya Jagadeesha Hare ||10|| Shree Jayadeva Kaver Idam Uditam Udaaram | Shrinu Sukhadam Shubhadam Bhava Saaram | Keshava Dhrita Dasha Vidha Roopa Jaya Jagadeesha Hare ||11||