Bhaj Govindam

भज गोविन्दं भज गोविन्दं गोविन्दं भज मूढमते। सम्प्राप्ते सन्निहिते काले नहि नहि रक्षति डुकृञ्करणे॥१॥ मूढ जहीहि धनागमतृष्णां कुरु सद्बुद्धिं मनसि वितृष्णाम्। यल्लभसे निजकर्मोपात्तं वित्तं तेन विनोदय चित्तम्॥२॥ नारीस्तनभरनाभीदेशं दृष्ट्वा मा गा मोहावेशम्। एतन्मांसवसादिविकारं मनसि विचिन्तय वारं वारम्॥३॥ नलिनीदलगतजलमतितरलं तद्वज्जीवितमतिशयचपलम्। विद्धि व्याध्यभिमानग्रस्तं लोकं शोकहतं च समस्तम्॥४॥ यावद्वित्तोपार्जनसक्तः तावन्निजपरिवारो रक्तः। पश्चाज्जीवति जर्जरदेहे वार्तां कोऽपि न पृच्छति गेहे॥५॥ यावत्पवनो निवसति देहे तावत्पृच्छति कुशलं गेहे। गतवति वायौ देहापाये भार्या बिभ्यति तस्मिन्काये॥६॥ बालस्तावत्क्रीडासक्तः तरुणस्तावत्तरुणीसक्तः। वृद्धस्तावच्चिन्तासक्तः परमे ब्रह्मणि कोऽपि न सक्तः॥७॥ का ते कान्ता कस्ते पुत्रः संसारोऽयमतीव विचित्रः। कस्य त्वं कः कुत आयातः तत्त्वं चिन्तय तदिह भ्रातः॥८॥ सत्सङ्गत्वे निस्सङ्गत्वं निस्सङ्गत्वे निर्मोहत्वम्। निर्मोहत्वे निश्चलतत्त्वं निश्चलतत्त्वे जीवन्मुक्तिः॥९॥ वयसि गते कः कामविकारः शुष्के नीरे कः कासारः। क्षीणे वित्ते कः परिवारः ज्ञाते तत्त्वे कः संसारः॥१०॥ मा कुरु धनजनयौवनगर्वं हरति निमेषात्कालः सर्वम्। मायामयमिदमखिलं हित्वा ब्रह्मपदं त्वं प्रविश विदित्वा॥११॥ दिनयामिन्यौ सायं प्रातः शिशिरवसन्तौ पुनरायातः। कालः क्रीडति गच्छत्यायुः तदपि न मुञ्चत्याशावायुः॥१२॥ अङ्गं गलितं पलितं मुण्डं दशनविहीनं जातं तुण्डम्। वृद्धो याति गृहीत्वा दण्डं तदपि न मुञ्चत्याशापिण्डम्॥१३॥ अग्रे वह्निः पृष्ठे भानुः रात्रौ चुबुकसमर्पितजानुः। करतलभिक्षस्तरुतलवासः तदपि न मुञ्चत्याशापाशः॥१४॥ कुरुते गङ्गासागरगमनं व्रतपरिपालनमथवा दानम्। ज्ञानविहीनः सर्वमतेन भजति न मुक्तिं जन्मशतेन॥१५॥ सुरमन्दिरतरुमूलनिवासः शय्या भूतलमजिनं वासः। सर्वपरिग्रहभोगत्यागः कस्य सुखं न करोति विरागः॥१६॥ योगरतो वा भोगरतो वा सङ्गरतो वा सङ्गविहीनः। यस्य ब्रह्मणि रमते चित्तं नन्दति नन्दति नन्दत्येव॥१७॥ भगवद्गीता किञ्चिदधीता गङ्गाजललवकणिका पीता। सकृदपि येन मुरारिसमर्चा क्रियते तस्य यमेन न चर्चा॥१८॥ पुनरपि जननं पुनरपि मरणं पुनरपि जननीजठरे शयनम्। इह संसारे बहुदुस्तारे कृपयापारे पाहि मुरारे॥१९॥ रथ्याचर्पटविरचितकन्थः पुण्यापुण्यविवर्जितपन्थः। योगी योगनियोजितचित्तो रमते बालोन्मत्तवदेव॥२०॥ कस्त्वं कोऽहं कुत आयातः का मे जननी को मे तातः। इति परिभावय सर्वमसारं विश्वं त्यक्त्वा स्वप्नविचारम्॥२१॥ त्वयि मयि चान्यत्रैको विष्णुः व्यर्थं कुप्यसि मय्यसहिष्णुः। भव समचित्तः सर्वत्र त्वं वाञ्छस्यचिराद्यदि विष्णुत्वम्॥२२॥ शत्रौ मित्रे पुत्रे बन्धौ मा कुरु यत्नं विग्रहसन्धौ। सर्वस्मिन्नपि पश्यात्मानं सर्वत्रोत्सृज भेदाज्ञानम्॥२३॥ कामं क्रोधं लोभं मोहं त्यक्त्वाऽऽत्मानं भावय कोऽहम्। आत्मज्ञानविहीना मूढाः ते पच्यन्ते नरकनिगूढाः॥२४॥ गेयं गीतानामसहस्रं ध्येयं श्रीपतिरूपमजस्रम्। नेयं सज्जनसङ्गे चित्तं देयं दीनजनाय च वित्तम्॥२५॥ सुखतः क्रियते रामाभोगः पश्चाद्धन्त शरीरे रोगः। यद्यपि लोके मरणं शरणं तदपि न मुञ्चति पापाचरणम्॥२६॥ प्राणायामं प्रत्याहारं नित्यानित्यविवेकविचारम्। जाप्यसमेतसमाधिविधानं कुर्ववधानं महदवधानम्॥२७॥ गुरुचरणाम्बुजनिर्भरभक्तः संसाराद्अचिराद्भव मुक्तः। सेन्द्रियमानसनियमादेवं द्रक्ष्यसि निजहृदयस्थं देवम्॥२८॥ भज गोविन्दं भज गोविन्दं गोविन्दं भज मूढमते। सम्प्राप्ते सन्निहिते काले नहि नहि रक्षति डुकृञ्करणे॥

Bhaja Govindam Bhaja Govindam Govindam Bhaja Mudhamate Samprapte Sannihite Kale Nahi Nahi Rakshati Dukrinkarane ||1|| Mudha Jahihi Dhanagama Trishnam Kuru Sadbuddhim Manasi Vitrishnam Yallabhase Nijakarmopaattam Vittam Tena Vinodaya Chittam ||2|| Nari Stanabhara Nabhidesham Drishtva Ma Ga Mohavesham Etan Mamsa Vasadi Vikaram Manasi Vichintaya Varam Varam ||3|| Nalineedala Gata Jalam Atitaralam Tadvaj Jeevitam Atishaya Chapalam Viddhi Vyadhyabhimana Grastam Lokam Shokahatam Cha Samastam ||4|| Yavad Vittoparjana Saktah Tavan Nija Parivaro Raktah Pashchaj Jeevati Jarjara Dehe Vartam Kopi Na Prichchhati Gehe ||5|| Yavat Pavano Nivasati Dehe Tavat Prichchhati Kushalam Gehe Gatavati Vayau Dehapaye Bharya Bibhyati Tasminkaye ||6|| Balas Tavat Kreeda Saktah Tarunas Tavat Taruni Saktah Vriddhas Tavach Chinta Saktah Parame Brahmani Kopi Na Saktah ||7|| Ka Te Kanta Kaste Putrah Samsaro Yam Ateeva Vichitrah Kasya Tvam Kah Kuta Ayatah Tattvam Chintaya Tadiha Bhratah ||8|| Satsangatve Nissangatvam Nissangatve Nirmohatvam Nirmohatve Nischala Tattvam Nischala Tattve Jeevanmuktih ||9|| Vayasi Gate Kah Kamavikarah Shushke Neere Kah Kasarah Ksheene Vitte Kah Parivarah Jnate Tattve Kah Samsarah ||10|| Ma Kuru Dhana Jana Yauvana Garvam Harati Nimeshat Kalah Sarvam Mayamayam Idam Akhilam Hitva Brahmapadam Tvam Pravisha Viditva ||11|| Dinayaminyau Sayam Pratah Shishira Vasantau Punar Ayatah Kalah Kreedati Gachchhaty Ayuh Tadapi Na Munchaty Asha Vayuh ||12|| Angam Galitam Palitam Mundam Dashana Viheenam Jatam Tundam Vriddho Yati Grihitva Dandam Tadapi Na Munchaty Asha Pindam ||13|| Agre Vahnih Prishthe Bhanuh Ratrau Chubuka Samarpita Januh Karatala Bhikshas Tarutala Vasah Tadapi Na Munchaty Asha Pashah ||14|| Kurute Ganga Sagara Gamanam Vrata Paripalanam Athava Danam Jnana Viheenah Sarvamatena Bhajati Na Muktim Janmashatena ||15|| Sura Mandira Taru Mula Nivasah Shayyaa Bhutalam Ajinam Vasah Sarva Parigraha Bhoga Tyagah Kasya Sukham Na Karoti Viragah ||16|| Yogarato Va Bhogarato Va Sangarato Va Sangaviheenah Yasya Brahmani Ramate Chittam Nandati Nandati Nandatyeva ||17|| Bhagavadgita Kinchid Adhita Gangajala Lavakanika Pita Sakridapi Yena Murari Samarcha Kriyate Tasya Yamena Na Charcha ||18|| Punarapi Jananam Punarapi Maranam Punarapi Janani Jathare Shayanam Iha Samsare Bahu Dustare Kripayapare Pahi Murare ||19|| Rathya Charpata Virachita Kanthah Punyapunya Vivarjita Panthah Yogi Yoga Niyojita Chitto Ramate Balonmattavadeva ||20|| Kastvam Koham Kuta Ayatah Ka Me Janani Ko Me Tatah Iti Paribhavaya Sarvamasaram Vishvam Tyaktva Svapna Vicharam ||21|| Tvayi Mayi Chanyatraiko Vishnuh Vyartham Kupyasi Mayyasahishnuh Bhava Samachittah Sarvatra Tvam Vachchhasyachirad Yadi Vishnuatvam ||22|| Shatrau Mitre Putre Bandhau Ma Kuru Yatnam Vigraha Sandhau Sarvasminnapi Pashyatmanam Sarvatrotsrija Bhedajnanam ||23|| Kamam Krodham Lobham Moham Tyaktvatmanam Bhavaya Koham Atmajnana Viheena Mudhah Te Pachyante Naraka Nigudhah ||24|| Geyam Gita Nama Sahasram Dhyeyam Shripati Rupam Ajasram Neyam Sajjana Sange Chittam Deyam Dina Janaya Cha Vittam ||25|| Sukhatah Kriyate Ramabhogah Pashchaddanta Sharire Rogah Yadyapi Loke Maranam Sharanam Tadapi Na Munchati Papacharanam ||26|| Pranayamam Pratyaharam Nityanitya Viveka Vicharam Japya Sameta Samadhi Vidhanam Kurvavadhanam Mahad Avadhanam ||27|| Guru Charanambuja Nirbhara Bhaktah Samsarad Achirad Bhava Muktah Sendriya Manasa Niyamad Evam Drakshyasi Nija Hridayastham Devam ||28|| Bhaja Govindam Bhaja Govindam Govindam Bhaja Mudhamate Samprapte Sannihite Kale Nahi Nahi Rakshati Dukrinkarane ||