Aditya Hridaya Stotram

ततो युद्धपरिश्रान्तं समरे चिन्तया स्थितम्। रावणं चाग्रतो दृष्ट्वा युद्धाय समुपस्थितम्॥१॥ दैवतैश्च समागम्य द्रष्टुमभ्यागतो रणम्। उपागम्याब्रवीद्रामं अगस्त्यो भगवान् ऋषिः॥२॥ राम राम महाबाहो शृणु गुह्यं सनातनम्। येन सर्वानरीन् वत्स समरे विजयिष्यसि॥३॥ आदित्यहृदयं पुण्यं सर्वशत्रुविनाशनम्। जयावहं जपेन्नित्यं अक्षय्यं परमं शिवम्॥४॥ सर्वमङ्गलमाङ्गल्यं सर्वपापप्रणाशनम्। चिन्ताशोकप्रशमनं आयुर्वर्धनमुत्तमम्॥५॥ रश्मिमन्तं समुद्यन्तं देवासुरनमस्कृतम्। पूजयस्व विवस्वन्तं भास्करं भुवनेश्वरम्॥६॥ सर्वदेवात्मको ह्येष तेजस्वी रश्मिभावनः। एष देवासुरगणान् लोकान् पाति गभस्तिभिः॥७॥ एष ब्रह्मा च विष्णुश्च शिवः स्कन्दः प्रजापतिः। महेन्द्रो धनदः कालो यमः सोमो ह्यपां पतिः॥८॥ पितरो वसवः साध्या ह्यश्विनौ मरुतो मनुः। वायुर्वह्निः प्रजाप्राणा ऋतुकर्ता प्रभाकरः॥९॥ आदित्यः सविता सूर्यः खगः पूषा गभस्तिमान्। सुवर्णसदृशो भानुः हिरण्यरेता दिवाकरः॥१०॥ हरिदश्वः सहस्रार्चिः सप्तसप्तिर्मरीचिमान्। तिमिरोन्मथनः शम्भुस्त्वष्टा मार्ताण्ड अंशुमान्॥११॥ हिरण्यगर्भः शिशिरस्तपनो भास्करो रविः। अग्निगर्भोऽदितेः पुत्रः शङ्खः शिशिरनाशनः॥१२॥ व्योमनाथस्तमोभेदी ऋग्यजुःसामपारगः। घनवृष्टिरपां मित्रो विन्ध्यवीथीप्लवङ्गमः॥१३॥ आतपी मण्डली मृत्युः पिङ्गलः सर्वतापनः। कविर्विश्वो महातेजाः रक्तः सर्वभवोद्भवः॥१४॥ नक्षत्रग्रहताराणां अधिपो विश्वभावनः। तेजसामपि तेजस्वी द्वादशात्मन्नमोऽस्तु ते॥१५॥ नमः पूर्वाय गिरये पश्चिमायाद्रये नमः। ज्योतिर्गणानां पतये दिनाधिपतये नमः॥१६॥ जयाय जयभद्राय हर्यश्वाय नमो नमः। नमो नमः सहस्रांशो आदित्याय नमो नमः॥१७॥ नम उग्राय वीराय सारङ्गाय नमो नमः। नमः पद्मप्रबोधाय मार्ताण्डाय नमो नमः॥१८॥ ब्रह्मेशानाच्युतेशाय सूर्यायादित्यवर्चसे। भास्वते सर्वभक्षाय रौद्राय वपुषे नमः॥१९॥ तमोघ्नाय हिमघ्नाय शत्रुघ्नायामितात्मने। कृतघ्नघ्नाय देवाय ज्योतिषां पतये नमः॥२०॥ तप्तचामीकराभाय वह्नये विश्वकर्मणे। नमस्तमोऽभिनिघ्नाय रुचये लोकसाक्षिणे॥२१॥ नाशयत्येष वै भूतं तदेव सृजति प्रभुः। पायत्येष तपत्येष वर्षत्येष गभस्तिभिः॥२२॥ एष सुप्तेषु जागर्ति भूतेषु परिनिष्ठितः। एष एवाग्निहोत्रं च फलं चैवाग्निहोत्रिणाम्॥२३॥ वेदाश्च क्रतवश्चैव क्रतूनां फलमेव च। यानि कृत्यानि लोकेषु सर्व एष रविः प्रभुः॥२४॥ एनमापत्सु कृच्छ्रेषु कान्तारेषु भयेषु च। कीर्तयन् पुरुषः कश्चिन्नावसीदति राघव॥२५॥ पूजयस्वैनमेकाग्रो देवदेवं जगत्पतिम्। एतत् त्रिगुणितं जप्त्वा युद्धेषु विजयिष्यसि॥२६॥ अस्मिन् क्षणे महाबाहो रावणं त्वं वधिष्यसि। एवमुक्त्वा तदाऽगस्त्यो जगाम च यथागतम्॥२७॥ एतच्छ्रुत्वा महातेजाः नष्टशोकोऽभवत् तदा। धारयामास सुप्रीतो राघवः प्रयतात्मवान्॥२८॥ आदित्यं प्रेक्ष्य जप्त्वा तु परं हर्षमवाप्तवान्। त्रिराचम्य शुचिर्भूत्वा धनुरादाय वीर्यवान्॥२९॥ रावणं प्रेक्ष्य हृष्टात्मा युद्धाय समुपागमत्। सर्वयत्नेन महता वधे तस्य धृतोऽभवत्॥३०॥

Tato yuddhaparishrantam samare chintaya sthitam Ravanam chagrato drishtva yuddhaya samupasthitam ||1|| Daivataischa samagamya drashtumabhyagato ranam Upagamyabraveedramam agastyo bhagavan rishih ||2|| Rama Rama mahabaho shrunu guhyam sanatanam Yena sarvanarin vatsa samare vijayishyasi ||3|| Adityahridayam punyam sarvashatruvinashanam Jayavaham japennityam akshayam paramam shivam ||4|| Sarvamangala mangalyam sarvapaapa pranashanam Chintashoka prashamanam ayurvardhanamuttamam ||5|| Rashmimantam samudyantam devasuranamas kritam Poojayasva vivasvantam bhaskaram bhuvaneshvaram ||6|| Sarvadevat mako hyesha tejasvee rashmibhavanah Esha devasuraganan lokan pati gabhas tibhih ||7|| Esha Brahma cha Vishnushcha Shivah Skandah Prajapatih Mahendro Dhanadah Kalo Yamah Somo hyapam patih ||8|| Pitaro Vasavah Sadhya hyashvinau Maruto Manuh Vayurvahnih prajaapraanaa ritukarta prabhaakarah ||9|| Adityah Savita Suryah Khagah Pusha Gabhastiman Suvarnasdrisho Bhanuh Hiranyareta Divakarah ||10|| Haridashvah Sahasrarchih Saptasaptir Marichiman Timironmathanah Shambhus Tvashta Martanda Anshuman ||11|| Hiranyagarbhah Shishiras Tapano Bhaskaro Ravih Agnigarbho Aditeh Putrah Shankhah Shishira Nashanah ||12|| Vyomanathas Tamobhedi Rigyajuh Saama Paragah Ghanavrshtir Apam Mitro Vindhyaveethi Plavangamah ||13|| Aatapee Mandalee Mrityuh Pingalah Sarvatapanah Kavirvisho Mahatejah Raktah Sarvabhavodbhavah ||14|| Nakshatragraha Taranam Adhipo Vishvabhavanah Tejasam Api Tejasvee Dvadashatman Namostute ||15|| Namah Poorvaya Giraye Pashchimaya Adraye Namah Jyotirgananam Pataye Dinadhipataye Namah ||16|| Jayaya Jayabhadraya Haryashvaya Namo Namah Namo Namah Sahasramsho Adityaya Namo Namah ||17|| Nama Ugraya Veeraya Sarangaya Namo Namah Namah Padma Prabodhaya Martandaya Namo Namah ||18|| Brahmeshanachyuteshaya Suryaya Adityavarchase Bhasvate Sarvabhakshaya Raudraya Vapushe Namah ||19|| Tamoghnaya Himaghnaya Shatrughnaya Amitatmane Kritaghna ghnaya Devaya Jyotisham Pataye Namah ||20|| Taptachamikarabhaya Vahnaye Vishvakarmane Namastamo Abhinighnaya Ruchaye Lokasaakshine ||21|| Nashayatyesha Vai Bhutam Tadeva Srijati Prabhuh Payatyesha Tapatyesha Varshatyesha Gabhastibhih ||22|| Esha Supteshu Jagarti Bhuteshu Parinishthitah Esha Evagnihotram Cha Phalam Chaivagnihotrinam ||23|| Vedashcha Kratavashchaiva Kratunam Phalameva Cha Yani Krityani Lokeshu Sarva Esha Ravih Prabhuh ||24|| Enamapatsu Krichhreshu Kantareshu Bhayeshu Cha Keertayan Purushah Kashchin Naavaseedati Raghava ||25|| Poojayasvainamekagro Devadevam Jagatpatim Etat Trigunitam Japtva Yudhdeshu Vijayishyasi ||26|| Asmin Kshane Mahabaho Ravanam Tvam Vadhishyasi Evamuktvaa Tadaa Agastyo Jagaama Cha Yathagatam ||27|| Etacchrutva Mahatejah Nashtashoko Abhavat Tada Dharayamasa Supreeto Raghavah Prayatatmavan ||28|| Adityam Prekshya Japtvaa Tu Param Harsham Avaaptavan Trirachamya Shuchirbhutva Dhanuradaya Veeryavan ||29|| Ravanam Prekshya Hrushtatma Yuddhaya Samupagamat Sarvayatnena Mahata Vadhe Tasya Dhrito Abhavat ||30||