Lakshmi Nrisimha Karavalambam

॥ श्री लक्ष्मीनृसिंह करावलम्ब स्तोत्रम् ॥ श्रीमत्पयोनिधिनिकेतनचक्रपाणे भोगीन्द्रभोगमणिरञ्जितपुण्यमूर्ते। योगीश शाश्वत शरण्य भवाब्धिपोत लक्ष्मीनृसिंह मम देहि करावलम्बम्॥१॥ ब्रह्मेन्द्ररुद्रमरुदर्ककिरीटकोटि- सङ्घट्टिताङ्घ्रिकमलामलकान्तिकान्त। लक्ष्मीलसत्कुचसरोरुहराजहंस लक्ष्मीनृसिंह मम देहि करावलम्बम्॥२॥ संसारसागरविशालकरालकाल- नक्रग्रहग्रसननिग्रहविग्रहस्य। व्यग्रस्य रागरसनोर्मिनिपीडितस्य लक्ष्मीनृसिंह मम देहि करावलम्बम्॥३॥ संसारवृक्षमघबीजमनन्तकर्म- शाखायुतं करणपत्रमनङ्गपुष्पम्। आरुह्य दुःखफलितं पततो दयालो लक्ष्मीनृसिंह मम देहि करावलम्बम्॥४॥ संसारसर्पघनवक्त्रभयोग्रतीव्र- दंष्ट्राकरालविषदग्धविनष्टमूर्तेः। नागारिवाहन सुधाब्धिनिवास शौरे लक्ष्मीनृसिंह मम देहि करावलम्बम्॥५॥ संसारदावदहनातुरभीकरोरु- ज्वालावलीभिरतिदग्धतनूरुहस्य। त्वत्पादपद्मसरसीरुहमागतस्य लक्ष्मीनृसिंह मम देहि करावलम्बम्॥६॥ संसारजालपतितस्य जगन्निवास सर्वेन्द्रियार्थबडिशाग्रझषोपमस्य। प्रोत्कम्पितप्रचुरतालुकमस्तकस्य लक्ष्मीनृसिंह मम देहि करावलम्बम्॥७॥ संसारकूपमतिघोरमगाधमूलं सम्प्राप्य दुःखशतसर्पसमाकुलस्य। दीनस्य देव कृपया पदमागतस्य लक्ष्मीनृसिंह मम देहि करावलम्बम्॥८॥ संसारभीकरकरीन्द्रकराभिघात- निष्पीड्यमानवपुषः सकलार्तिनाश। प्राणप्रयाणभवभीतिसमाकुलस्य लक्ष्मीनृसिंह मम देहि करावलम्बम्॥९॥ अन्धस्य मे हृतविवेकमहाधनस्य चोरैर्महाबलिभिरिन्द्रियनामधेयैः। मोहान्धकारकुहरे विनिपातितस्य लक्ष्मीनृसिंह मम देहि करावलम्बम्॥१०॥ लक्ष्मीपते कमलनाभ सुरेश विष्णो वैकुण्ठ कृष्ण मधुसूदन पुष्कराक्ष। ब्रह्मण्य केशव जनार्दन वासुदेव लक्ष्मीनृसिंह मम देहि करावलम्बम्॥११॥ एकेन चक्रमपरेण करेण शङ्खं अन्येन सिन्धुतनयामवलम्ब्य तिष्ठन्। वामेतरेण वरदाभयपद्मचिह्नं लक्ष्मीनृसिंह मम देहि करावलम्बम्॥१२॥

|| Shri Lakshmi Nrisimha Karavalamba Stotram || Shreemat Payonidhi Niketana Chakra Paane Bhogeendra Bhoga Mani Ranjita Punya Moorte | Yogeesha Shaashvata Sharanya Bhavaabdhi Pota Lakshmi Nrisimha Mama Dehi Karavalambam ||1|| Brahmendra Rudra Marudarka Kireeta Koti Sanghatitaanghri Kamala Amala Kaanti Kaanta | Lakshmi Lasat Kucha Saroruha Raaja Hamsa Lakshmi Nrisimha Mama Dehi Karavalambam ||2|| Samsaara Saagara Vishaala Karaala Kaala Nakra Graha Grasana Nigraha Vigrahasya | Vyagrasya Raaga Rasanormi Nipeeditasya Lakshmi Nrisimha Mama Dehi Karavalambam ||3|| Samsaara Vriksham Agha Beejam Ananta Karma Shaakhaayutam Karana Patram Ananga Pushpam | Aaruhya Duhkha Phalitam Patato Dayaalo Lakshmi Nrisimha Mama Dehi Karavalambam ||4|| Samsaara Sarpa Ghana Vaktra Bhayogra Teevra Damshtraa Karaala Visha Dagdha Vinashta Moorteh | Naagaari Vaahana Sudhaabdhi Nivaasa Shaure Lakshmi Nrisimha Mama Dehi Karavalambam ||5|| Samsaara Daava Dahanaatura Bheekararoru Jvaalaa Valeebhir Atidagdha Tanoo Ruhasya | Tvat Paada Padma Sarasee Ruham Aagatasya Lakshmi Nrisimha Mama Dehi Karavalambam ||6|| Samsaara Jaala Patitasya Jagan Nivaasa Sarvendriyaartha Badishaagra Jhashopamasy | Protkampita Prachura Taaluka Mastakasya Lakshmi Nrisimha Mama Dehi Karavalambam ||7|| Samsaara Koopam Ati Ghoram Agaadha Moolam Sampraapya Duhkha Shata Sarpa Samakulasya | Deenasya Deva Kripayaa Padam Aagatasya Lakshmi Nrisimha Mama Dehi Karavalambam ||8|| Samsaara Bheekara Kareendra Karaabhi Ghaata Nishpeedyamaana Vapushah Sakalaart Naasha | Praana Prayaana Bhava Bheeti Samakulasya Lakshmi Nrisimha Mama Dehi Karavalambam ||9|| Andhasya Me Hrita Viveka Mahaa Dhanasya Chorair Mahaa Balibhir Indriya Naama Dheyaih | Mohaandhakaaraa Kuhare Vinipaastitasya Lakshmi Nrisimha Mama Dehi Karavalambam ||10|| Lakshmi Pate Kamala Naabha Suresha Vishno Vaikuntha Krishna Madhu Soodana Pushkaraaksha | Brahmanya Keshava Janaardana Vaasudeva Lakshmi Nrisimha Mama Dehi Karavalambam ||11|| Ekena Chakram Aparena Karena Shankham Anyena Sindhu Tanayaam Avalambya Tishtan | Vaametarena Varadaabhaya Padma Chihnam Lakshmi Nrisimha Mama Dehi Karavalambam ||12||