Vishvanath Ashtakam

॥ श्री विश्वनाथाष्टकम् ॥ गङ्गातरङ्गरमणीयजटाकलापं गौरीनिरन्तरविभूषितवामभागम्। नारायणप्रियमनङ्गमदापहारं वाराणसीपुरपतिं भज विश्वनाथम्॥१॥ वाचामगोचरमनेकगुणस्वरूपं वागीशविष्णुसुरसेवितपादपीठम्। वामेन विग्रहवरेण कलत्रवन्तं वाराणसीपुरपतिं भज विश्वनाथम्॥२॥ भूताधिपं भुजगभूषणभूषिताङ्गं व्याघ्राजिनाम्बरधरं जटिलं त्रिनेत्रम्। पाशाङ्कुशाभयवरप्रदशूलपाणिं वाराणसीपुरपतिं भज विश्वनाथम्॥३॥ शीतांशुशोभितकिरीटविराजमानं भालेक्षणानलविशोषितपञ्चबाणम्। नागाधिपारचितभास्वरकर्णपूरं वाराणसीपुरपतिं भज विश्वनाथम्॥४॥ पञ्चाननं दुरितमत्तमतङ्गजानां नागान्तकं दनुजपुङ्गवपन्नगानाम्। दावानलं मरणशोकजराटवीनां वाराणसीपुरपतिं भज विश्वनाथम्॥५॥ तेजोमयं सगुणनिर्गुणमद्वितीयं आनन्दकन्दमपराजितमप्रमेयम्। नागात्मकं सकलनिष्कलमात्मरूपं वाराणसीपुरपतिं भज विश्वनाथम्॥६॥ आशां विहाय परिहृत्य परस्य निन्दां पापे रतिं च सुनिवार्य मनः समाधौ। आदाय हृत्कमलमध्यगतं परेशं वाराणसीपुरपतिं भज विश्वनाथम्॥७॥ रागादिदोषरहितं स्वजनानुरागं वैराग्यशान्तिनिलयं गिरिजासहायम्। माधुर्यधैर्यसुभगं गरलाभिरामं वाराणसीपुरपतिं भज विश्वनाथम्॥८॥ विश्वनाथाष्टकमिदं यः पठेच्छिवसन्निधौ। शिवलोकमवाप्नोति शिवेन सह मोदते॥

|| Shri Vishvanaathashtakam || Gangaa Taranga Ramaneeyaa Jataa Kalaapam Gauree Nirantara Vibhooshita Vaama Bhaagam | Naarayana Priyam Ananga Madaapahaaram Vaaraanasee Purapatim Bhaja Vishvanaatham ||1|| Vaachaam Agocharam Aneka Guna Svaroopam Vaageeshaa Vishnu Sura Sevita Paada Peetham | Vaamena Vigraha Varena Kalatraa Vantam Vaaraanasee Purapatim Bhaja Vishvanaatham ||2|| Bhootaadhipam Bhujaga Bhooshana Bhooshitaangam Vyaaghraajinaambaradharam Jatilam Trinetram | Paashaankushaabhaya Vara Prada Shoola Paanim Vaaraanasee Purapatim Bhaja Vishvanaatham ||3|| Sheetaamshu Shobhita Kireeta Viraajamaanam Bhaalekshanaanala Vishoshita Pancha Baanam | Naagaadhipaarachita Bhaasvara Karna Pooram Vaaraanasee Purapatim Bhaja Vishvanaatham ||4|| Panchaanamam Durita Matta Matangajaanaam Naagaantakam Danuja Pungava Pannagaanaam | Daavaanalam Marana Shoka Jaraa Taveenam Vaaraanasee Purapatim Bhaja Vishvanaatham ||5|| Tejomayam Saguna Nirgunam Adviteeyam Aananda Kandam Aparaajitam Aprameyam | Naagaatmakam Sakala Nishkalam Aatma Roopam Vaaraanasee Purapatim Bhaja Vishvanaatham ||6|| Aashaam Vihaaya Parihritya Parasya Nindaam Paape Ratim Cha Sunivarya Manah Samaadhau | Aadaaya Hrit Kamala Madhya Gatam Paresham Vaaraanasee Purapatim Bhaja Vishvanaatham ||7|| Raagaadi Dosha Rahitam Svajanaa Nuraagam Vairaagya Shaanti Nilayam Girijaa Sahaayam | Maadhurya Dhairya Subhagam Garalaabhiraamam Vaaraanasee Purapatim Bhaja Vishvanaatham ||8|| Vishvanaathashtakam Idam Yah Pathech Chiva Sannidhau | Shiva Lokam Avaapnoti Shivena Saha Modate ||