Shiv Raksha Stotram

॥ अथ शिवरक्षास्तोत्रम् ॥ अस्य श्रीशिवरक्षास्तोत्रमन्त्रस्य याज्ञवल्क्य ऋषिः। श्रीसदाशिवो देवता। अनुष्टुप् छन्दः। श्रीसदाशिवप्रीत्यर्थे शिवरक्षास्तोत्रजपे विनियोगः॥ चरितं देवदेवस्य महादेवस्य पावनम्। अपरं परमोदारं चतुर्वर्गस्य साधनम्॥१॥ गौरीविनायकोपेतं पञ्चवक्त्रं त्रिनेत्रकम्। शिवं ध्यात्वा दशभुजं शिवरक्षां पठेन्नरः॥२॥ गङ्गाधरः शिरः पातु भालमर्धेन्दुशेखरः। नयने मदनध्वंसी कर्णौ सर्पविभूषणः॥३॥ घ्राणं पातु पुरारातिर्मुखं पातु जगत्पतिः। जिह्वां वागीश्वरः पातु कन्धरां शितिकन्धरः॥४॥ श्रीकण्ठः पातु मे कण्ठं स्कन्धौ विश्वधुरन्धरः। भुजौ भूभारसंहर्ता करौ पातु पिनाकधृक्॥५॥ हृदयं शंकरः पातु जठरं गिरिजापतिः। नाभिं मृत्युञ्जयः पातु कटी व्याघ्राजिनाम्बरः॥६॥ सक्थिनी पातु दीनार्तशरणागतवत्सलः। ऊरू महेश्वरः पातु जानुनी जगदीश्वरः॥७॥ जङ्घे पातु जगत्कर्ता गुल्फौ पातु गणाधिपः। चरणौ करुणासिन्धुः सर्वाङ्गानि सदाशिवः॥८॥ एतां शिवबलोपेतां रक्षां यः सुकृती पठेत्। स भुक्त्वा सकलान् कामान् शिवसायुज्यमाप्नुयात्॥९॥ ग्रहभूतपिशाचाद्यास्त्रैलोक्ये विचरन्ति ये। दूरादाशु पलायन्ते शिवनामाभिरक्षणात्॥१०॥ अभयङ्करनामेदं कवचं पार्वतीपतेः। भक्त्या बिभर्ति यः कण्ठे तस्य वश्यं जगत्रयम्॥११॥ इमां नारायणः स्वप्ने शिवरक्षां यथाऽऽदिशत्। प्रातरुत्थाय योगीन्द्रो याज्ञवल्क्यः तथालिखत्॥१२॥ ॥ इति श्रीयाज्ञवल्क्यप्रोक्तं शिवरक्षास्तोत्रं सम्पूर्णम् ॥

|| Atha Shiva Raksha Stotram || Asya Sri Shiva Raksha Stotra Mantrasya Yajnavalkya Rishih Sri Sadashivo Devata Anushtup Chhandah Sri Sadashiva Preetyarthe Shiva Raksha Stotra Jape Viniyogah Charitam Devadevasya Mahadevasya Pavanam Aparam Paramodaram Chaturvargasya Sadhanam ||1|| Gauri Vinayakopetam Panchavaktram Trinetrakam Shivam Dhyatva Dashabhujam Shiva Raksham Pathen Narah ||2|| Gangadharah Shirah Patu Bhalam Ardhendu Shekharah Nayane Madanadhvamsi Karnau Sarpa Vibhushanah ||3|| Ghranam Patu Puraratir Mukham Patu Jagatpatih Jihvam Vagishvarah Patu Kandharam Shitikandharah ||4|| Shrikanthah Patu Me Kantham Skandhau Vishva Dhurandharah Bhujau Bhubhara Samharta Karau Patu Pinakadhrk ||5|| Hridayam Shankarah Patu Jatharam Girijapatih Nabhim Mrityunjayah Patu Kati Vyaghrajinaambarah ||6|| Sakthini Patu Deenarta Sharanagata Vatsalah Uru Maheshvarah Patu Januni Jagadishvarah ||7|| Janghe Patu Jagatkarta Gulphau Patu Ganadhipah Charanau Karunaa Sindhuh Sarvangani Sadashivah ||8|| Etam Shiva Balopetam Raksham Yah Sukriti Pathet Sa Bhuktva Sakalan Kaman Shiva Sayujyam Apnuyat ||9|| Graha Bhuta Pishachadyas Trailokye Vicharanti Ye Durad Ashu Palayante Shivanamabhi Rakshanat ||10|| Abhayankara Namedam Kavacham Parvatipateh Bhaktya Bibharti Yah Kanthe Tasya Vashyam Jagatrayam ||11|| Imam Narayanah Svapne Shiva Raksham Yathaadishat Pratar Utthaya Yogindro Yajnavalkyah Tathalikhat ||12|| || Iti Sri Yajnavalkya Proktam Shiva Raksha Stotram Sampoornam ||